17 настай хүү агт араа авахуулах мэс заслын үеэр харамсалтайгаар нас баржээ.

АНУ-ын Вашингтон мужид 2024 оны зун 17 настай эрүүл саруул хүү агт араа авах энгийн хагалгааны үеэр амь насаа алдсан хэрэг олон нийтийн анхаарлыг татжээ. Уг явдал нь агт араа авах мэс заслыг ихэнх хүн эрсдэл багатай, энгийн гэж ойлгодог ч бодит байдал дээр аюулгүй ажиллагааны стандарт алдагдвал ноцтой үр дагаварт хүрч болдгийг харуулсан сургамжит тохиолдол болжээ.

Талийгаач Эрик Эдж (Eric Edge) нь ямар нэгэн архаг өвчингүй, эрүүл өсвөр насны хүү байсан бөгөөд хагалгааны үеэр хэрэглэсэн мэдээ алдуулалтын улмаас амьсгалын зам нь хаагдсан байна. Ийм төрлийн урвал нь анагаах ухаанд ховор биш тохиолддог бөгөөд ихэнх үед өвчтөний амин үзүүлэлтийг байнга хянаж байдаг мэргэжлийн мэдээ алдуулагч үүнийг даруй илрүүлж, амьсгалыг хэвийн байлгах арга хэмжээ авдаг аж. Гэвч энэ тохиолдолд хагалгаа хийж байсан эмч мэдээ алдуулалтыг мөн өөрөө хариуцаж байсан тул өвчтөний амьсгал, зүрхний цохилт зэрэгт хангалттай анхаарал хандуулж чадаагүй байж болзошгүй гэж үзэж байна. Үүний улмаас амьсгалын зам хаагдсаныг хэт оройтож анзаарсан бөгөөд шаардлагатай яаралтай тусламжийг цаг алдалгүй үзүүлж амжаагүй нь эмгэнэлт үр дүнд хүргэжээ.

Энэ хэрэг нь нэг хүний, нэг гэр бүлийн асуудлаас давж, агт араа авах мэс засалд ч аюулгүй ажиллагааны өндөр стандарт зайлшгүй хэрэгтэй гэдгийг дахин сануулж байна. Ялангуяа мэдээ алдуулалт хэрэглэж байгаа тохиолдолд тухайн өвчтөнд бүх анхаарлаа төвлөрүүлдэг тусгай мэргэжилтэн байх нь олон улсын практикт чухалд тооцогддог. Мэргэжилтнүүдийн хэлж буйгаар, эцэг эхчүүд болон өвчтөнүүд агт араа авах хагалгааг “энгийн” гэж хэтэрхий итгэлтэйгээр хүлээж авах бус, ямар мэдээ алдуулалт хэрэглэх вэ, амин үзүүлэлтийг хэн хянах вэ, яаралтай үед ямар бэлтгэлтэй вэ гэдгийг урьдчилан тодруулах нь чухал аж.

Энэ эмгэнэлт явдал нь нэг зүйлийг тодорхой харууллаа. Хагалгаа том, жижиг байх нь чухал биш аюулгүй ажиллагааны алдаа гарвал “энгийн” процедур хүртэл амь насанд аюул учруулж болдгийг. Тиймээс ийм төрлийн мэс засалд орохоосоо өмнө асуулт асуух, мэдээлэл нэхэх нь өвчтөн болон эцэг эхийн эрх төдийгүй амь насыг хамгаалах чухал алхам юм.