“Чингис хааны үр сад Кремльд” нэртэй үзэсгэлэн Москвад дэлгэгджээ.

“Чингис хааны үр сад. Орос ба дэлхий” нэртэй төсөл нь Кремлийн музейн ойн цуврал арга хэмжээнүүдийн эхлэл болсон буйгаараа онцлог юм.

Уг үзэсгэлэн нь алтан ургийн гаралтай хүмүүс Оросын түүхэнд хэрхэн уялдан орж ирснийг харуулдаг. Үзэсгэлэнд Кремлийн эрдэнэсийн сангаас эхлээд бүс нутгийн олдворууд, Эрмитаж, Түүхийн музей, Оросын музей, Маржани сан зэрэг олон байгууллагаас цуглуулсан 150 гаруй үзмэрийг нэгтгэжээ.

“Бид олон зууны турш монгол болон орос угсаатнуудын харилцаа хэрхэн бүрэлдэн тогтсоныг өгүүлэхийг зорьж байна. Ялангуяа XV–XVII зуунд Чингис хааны асар том улс задран, татар-монголын эзэнт гүрний нутагт олон улс бий болсон үеийг онцолж, цаашлаад слав болон татар-монгол язгууртнууд хэрхэн харилцаж байсныг харуулж байна” хэмээн Кремлийн музейн захирал Елена Гагарина тайлбарласан байна.