Цагдаагийн байгууллагад энэ сарын 7-ны өдрийн 19:30 цагийн орчимд Хан-Уул дүүргийн 14-р хорооны нутаг дэвсгэрээс 18 морь алга болсон гэх мэдээлэл иржээ. Мэдээллийн дагуу цагдаагийн байгууллагаас мөрдөн шалгах ажиллагааг эхлүүлсэн байна.
Эрүүгийн цагдаагийн алба, ХУД-ийн цагдаагийн II хэлтэс, Налайх дүүргийн цагдаагийн газрын албан хаагчид шуурхай ажилласны үр дүнд уг гэмт хэргийг үйлдсэн байж болзошгүй 19-27 насны дөрвөн этгээдийг саатуулан шалгаж байна. Тэд хулгайлсан морьдыг СХД-ийн нутаг дэвсгэрт байрлах мал бойн газар махалсан нөхцөл тогтоогдсоныг цагдаагийн байгууллагаас мэдээлэв.
Хулгайд алдсан морьд “Монголын үндэсний морьт харваа”-ны үүсгэн байгуулагч Б.Болдбаатарынх байсан бөгөөд олон жил адгуулж сургасан, олон улсын морьт харвааны тэмцээн уралдаанд унаж оролцсон, удахгүй болох Үндэсний их баяр наадмын арга хэмжээнд унахаар бэлтгэж байсан аж. Морьдын эзэн маш их харамсаж буйгаа хэвлэлд ярьжээ.
Мөн мал хулгайлсан этгээдүүд шүүхээр ял шийтгэл оноох үед малын эзэн энэ гэмт хэргийн улмаас сэтгэцэд учирсан хор уршгийн зэрэглэлийг тогтоолгон нэхэмжлэх боломжтой.
Манай улсад “Гэмт хэргийн улмаас хүний сэтгэцэд учирсан хор уршгийн зэрэглэлийг тогтоож, дүгнэлт гаргах” эрхзүйн орчин 2022 онд Шүүх шинжилгээний тухай хууль (шинэчилсэн найруулга) батлагдсанаар бүрдсэн юм. Улмаар Шүүх шинжилгээний тухай хуулийн 40 дүгээр зүйлийн 40.1 дэх хэсэгт заасан Эрүүгийн хуулийн 14 бүлгийн 85 гэмт хэргийн улмаас хүний сэтгэцэд учирсан хор уршгийн зэрэглэлийг тогтоох үйл ажиллагаа 2023 оны долоодугаар сарын 1-ний өдрөөс эхэлсэн. Энэ 85-д малын хулгайн гэмт хэрэг багтсан.
-
Эрүүгийн хуулийн 11.6 дугаар зүйл (Хүний эрүүл мэндэд хөнгөн хохирол санаатай учруулах);
-
Эрүүгийн хуулийн 17.1 дүгээр зүйл (Хулгайлах);
-
Эрүүгийн хуулийн 17.3 дугаар зүйл (Залилах);
-
Эрүүгийн хуулийн 17.12 дугаар зүйл (Мал хулгайлах);
-
Эрүүгийн хуулийн 27.10 дугаар зүйл (Автотээврийн хэрэгслийн хөдөлгөөний аюулгүй байдал, ашиглалтын журам зөрчих).
Тухайлсан гэмт хэргийн улмаас хүний сэтгэцэд учирсан хор уршгийн зэрэглэлийг тогтоох хүснэгттэй ЭНД-ээс танилцах боломжтой.
